hangama hai kyuun barpa thoDi si jo pi li hai
Daaka to nahin maara chori to nahin ki hai
na-tajraba-kari se vaa.iz ki ye hain baten
is rang ko kya jaane puchho to kabhi pi hai
us mai se nahin matlab dil jis se hai begana
maqsud hai us mai se dil hi men jo khinchti hai
ai shauq vahi mai pi ai hosh zara so ja
mehman-e-nazar is dam ek barq-e-tajalli hai
vaan dil men ki sadme do yaan ji men ki sab sah lo
un ka bhi ajab dil hai mera bhi ajab ji hai
har zarra chamakta hai anvar-e-ilahi se
har saans ye kahti hai ham hain to ḳhuda bhi hai
suraj men lage dhabba fitrat ke karishme hain
but ham ko kahen kafir Allah ki marzi hai
ta.alim ka shor aisa tahzib ka ghul itna
barakat jo nahin hoti niyyat ki ḳharabi hai
sach kahte hain shaiḳh ‘akbar’ hai ta.at-e-haq lazim
haan tark-e-mai-o-shahid ye un ki buzurgi hai
ہنگامہ ہے کیوں برپا تھوڑی سی جو پی لی ہے
ڈاکا تو نہیں مارا چوری تو نہیں کی ہے
نا تجربہ کاری سے واعظ کی یہ ہیں باتیں
اس رنگ کو کیا جانے پوچھو تو کبھی پی ہے
اس مے سے نہیں مطلب دل جس سے ہے بیگانہ
مقصود ہے اس مے سے دل ہی میں جو کھنچتی ہے
اے شوق وہی مے پی اے ہوش ذرا سو جا
مہمان نظر اس دم ایک برق تجلی ہے
واں دل میں کہ صدمے دو یاں جی میں کہ سب سہہ لو
ان کا بھی عجب دل ہے میرا بھی عجب جی ہے
ہر ذرہ چمکتا ہے انوار الٰہی سے
ہر سانس یہ کہتی ہے ہم ہیں تو خدا بھی ہے
سورج میں لگے دھبا فطرت کے کرشمے ہیں
بت ہم کو کہیں کافر اللہ کی مرضی ہے
تعلیم کا شور ایسا تہذیب کا غل اتنا
برکت جو نہیں ہوتی نیت کی خرابی ہے
سچ کہتے ہیں شیخ اکبرؔ ہے طاعت حق لازم
ہاں ترک مے و شاہد یہ ان کی بزرگی ہے
AKBAR ALLAHABADI
