baat karni mujhe mushkil kabhi aisi to na thi
jaisi ab hai tiri mahfil kabhi aisi to na thi
le gaya chhin ke kaun aaj tira sabr o qarar
be-qarari tujhe ai dil kabhi aisi to na thi
us ki ankhon ne khuda jaane kiya kya jaadu
ki tabi.at miri maa.il kabhi aisi to na thi
aks-e-rukhsar ne kis ke hai tujhe chamkaya
taab tujh men mah-e-kamil kabhi aisi to na thi
ab ki jo rah-e-mohabbat men uTha.i taklif
sakht hoti hamen manzil kabhi aisi to na thi
pa-e-kuban koi zindan men naya hai majnun
aati avaz-e-salasil kabhi aisi to na thi
nigah-e-yar ko ab kyuun hai taghaful ai dil
vo tire haal se ghafil kabhi aisi to na thi
chashm-e-qatil miri dushman thi hamesha lekin
jaisi ab ho ga.i qatil kabhi aisi to na thi
kya sabab tu jo bigaDta hai ‘zafar’ se har baar
ḳhu tiri hur-shama.il kabhi aisi to na thi
بات کرنی مجھے مشکل کبھی ایسی تو نہ تھی
جیسی اب ہے تری محفل کبھی ایسی تو نہ تھی
لے گیا چھین کے کون آج ترا صبر و قرار
بے قراری تجھے اے دل کبھی ایسی تو نہ تھی
اس کی آنکھوں نے خدا جانے کیا کیا جادو
کہ طبیعت مری مائل کبھی ایسی تو نہ تھی
عکس رخسار نے کس کے ہے تجھے چمکایا
تاب تجھ میں مہ کامل کبھی ایسی تو نہ تھی
اب کی جو راہ محبت میں اٹھائی تکلیف
سخت ہوتی ہمیں منزل کبھی ایسی تو نہ تھی
پائے کوباں کوئی زنداں میں نیا ہے مجنوں
آتی آواز سلاسل کبھی ایسی تو نہ تھی
نگہ یار کو اب کیوں ہے تغافل اے دل
وہ ترے حال سے غافل کبھی ایسی تو نہ تھی
چشم قاتل مری دشمن تھی ہمیشہ لیکن
جیسی اب ہو گئی قاتل کبھی ایسی تو نہ تھی
کیا سبب تو جو بگڑتا ہے ظفرؔ سے ہر بار
خو تری حور شمائل کبھی ایسی تو نہ تھی
BAHADUR SHAH ZAFAR
