aa.e kuchh abr kuchh sharab aae
is ke ba.ad aa.e jo azaab aa.e
bam-e-mina se mahtab utre
dast-e-saqi men aftab aa.e
har rag-e-khun men phir charaghan ho
samne phir vo be-naqab aa.e
umr ke har varaq pe dil ki nazar
teri mehr-o-vafa ke baab aa.e
kar raha tha gham-e-jahan ka hisab
aaj tum yaad be-hisab aa.e
na ga.i tere gham ki sardari
dil men yuun roz inqalab aa.e
jal uThe bazm-e-ghair ke dar-o-bam
jab bhi ham khanuman-kharab aa.e
is tarah apni khamushi gunji
goya har samt se javab aa.e
‘faiz’ thi raah sar-ba-sar manzil
ham jahan pahunche kamyab aa.e
آئے کچھ ابر کچھ شراب آئے
اس کے بعد آئے جو عذاب آئے
بام مینا سے ماہتاب اترے
دست ساقی میں آفتاب آئے
ہر رگ خوں میں پھر چراغاں ہو
سامنے پھر وہ بے نقاب آئے
عمر کے ہر ورق پہ دل کی نظر
تیری مہر و وفا کے باب آئے
کر رہا تھا غم جہاں کا حساب
آج تم یاد بے حساب آئے
نہ گئی تیرے غم کی سرداری
دل میں یوں روز انقلاب آئے
جل اٹھے بزم غیر کے در و بام
جب بھی ہم خانماں خراب آئے
اس طرح اپنی خامشی گونجی
گویا ہر سمت سے جواب آئے
فیضؔ تھی راہ سر بسر منزل
ہم جہاں پہنچے کامیاب آئے
FAIZ AHMAD FAIZ
