hasti apni habab ki si hai
ye numa.ish sarab ki si hai
nazuki us ke lab ki kya kahiye
pankhuDi ik gulab ki si hai
chashm-e-dil khol is bhi aalam par
yaan ki auqat khvab ki si hai
baar baar us ke dar pe jaata huun
halat ab iztirab ki si hai
nuqta-e-ḳhal se tira abru
bait ik intikhab ki si hai
main jo bola kaha ki ye avaz
usi khana-kharab ki si hai
atish-e-ġham men dil bhuna shayad
der se bu kabab ki si hai
dekhiye abr ki tarah ab ke
meri chashm-e-pur-ab ki si hai
‘mīr’ un nim-baz ankhon men
saari masti sharab ki si hai
ہستی اپنی حباب کی سی ہے
یہ نمائش سراب کی سی ہے
نازکی اس کے لب کی کیا کہیے
پنکھڑی اک گلاب کی سی ہے
چشم دل کھول اس بھی عالم پر
یاں کی اوقات خواب کی سی ہے
بار بار اس کے در پہ جاتا ہوں
حالت اب اضطراب کی سی ہے
نقطۂ خال سے ترا ابرو
بیت اک انتخاب کی سی ہے
میں جو بولا کہا کہ یہ آواز
اسی خانہ خراب کی سی ہے
آتش غم میں دل بھنا شاید
دیر سے بو کباب کی سی ہے
دیکھیے ابر کی طرح اب کے
میری چشم پر آب کی سی ہے
میرؔ ان نیم باز آنکھوں میں
ساری مستی شراب کی سی ہے
MEER TAQI MEER
